Lat Austyn haue his swynk to hym reserued Therfore he was a prykasour aryght Grehoundes he hadde as swift as fowel in flyght Of prikyng and of huntyng for the haare Was al his lust for no cost wolde he spaare I saugh his sleues purfiled at the hond With grys and that the fyneste of a lond And for to festne his hood vnder his chyn He hadde of gold wroght a ful curious pyn A loue knotte in the gretter ende ther was His heed was balled that shoon as any glas And eek his face as he hadde been enoynt He was a lord ful fat and in good poynt Hise eyen steepe and rollynge in his heed That stemed as a fourneys of a leed Hise bootes souple his hors in greet estaat Now certeynly he was a fair prelat He was nat paale as is a forpyned goost A fat swan loued he best of any roost His palfrey was as broun as any berye From Tc2 He was a porke hogge for the maystry A Frere ther was a wantowne and a merye A lymytour a ful solempne man In alle the ordres foure is noon that kan So muche of daliaunce and fair langage He hadde maked ful many a mariage Of yonge wommen at his owene cost Vnto his ordre he was a noble post Ful wel biloued and famylier was hee With frankeleyns oueral in his contree